Omaggio alla Pizza

di Adolfo Giuliani

8 dicembre, “L’ARTE TRADIZIONALE DEI PIZZAIUOLI NAPOLETANI” È PATRIMONIO CULTURALE INMMATERIALE DELL’UMANITÀ.

 

 W Editoriale 23-17 Giuliani Omaggio alla Pizza

’A pizza

I’ so’ ’a pizza,

ccà, a casa mia, 

a Napule,

me cunuscite tutti quanti,

e me canosce pure

tutt’ ’o munno

e pure fora d’ ’o munno,

pecché m’hanno purtato pure int’ ’o spazio!

Mo tengo ’o riconoscimento

d’ ’a giuria e l’Unesco,

pe’ comme songo stata brava!

’Nu riconoscimento importante

pe’ chi, comme a mme, ha faticato tanto!

’E genitore mieje

se chiammano“Vesuvio”

e “Partenope”.

Ponno essere cuntente:

loro so’ state assaje importante 

pe’ me.

Mo aggio saputo

ca tutte ’e pparte d’ ’a terra

me vonno bene

e ca ’o premio è stato giusto e meritato

pe’ tutto chello c’aggio fatto

da che so’ nata,

pe’ chesto ve voglio ringrazià

a tutte quante,

ma aggi’ ’a ringrazià pe’ primma cosa

e genitore mieie

e tutte ’e frate e sore

ca m’hanno aiutato a crescere.

Quanno so’ nata nun ’a canoscevo ’a pummarola,

po’ c’ ’o tiempo me l’hanno presentata

e accussì è accumminciata ’na bella amicizia,

mettenno ’nzieme, ‘a pummarola, l’uoglio, l’aglio

e ’o ppoco d’aregeta,

me chiammavano marenara.

Po’, doppo tantu tiempo,

avimmo fatto pure 

sulo pummarola, muzzarella, uoglio e vasinicola

e me chiammavano margherita.

Chianu chianu ’o guardarobba è crisciuto

’e vestite so’ state tante,

’e tante manere,

ma sempe sapurite.

’E mieje m’hanno crisciute

cu ’e mullechelle,

nun m’hanno fatto mancà maje niente

e m’hanno fatto pure viaggià tanto,

facennome canoscere ’o munno intero.

’A famiglia mia

m’ha aiutata a essere sempe cchiù bella

e ’o vvoglio dicere,

i’, senza lloro, addó ievo?

A me me piace ’e viaggià

i’ vaco sempe ’a tutte parte

e addu tutte chille

ca me vonno bene,

pirciò i’ vengo pure addu vuie,

quanno me vulite,

ma po’ torno sempe ’n’ata vota ’a casa mia

pecché i’, luntana ’a Napule,

nun pozzo stà.